ՄԱԿ-ն ընդունել է բանաձեւ ապատեղեկատվությանը եւ խտրականությանը դիմակայելու մասին

  • by Western Armenia, 16 Հունիսի, 2023 in Քաղաքականություն
74 դիտում

ՄԱԿ Անվտանգության խորհուրդը միաձայն բանաձեւ է ընդունել հանդուրժողականության եւ միջազգային խաղաղության ու անվտանգության աջակցության վերաբերյալ։

Փաստաթղթում ընդգծվել է, որ ՄԱԿ անդամ երկրները կողմնակից են միմյանց հետ խաղաղ ապրելուն, հաստատում են միջազգային համագործակցության անհրաժեշտությունը տնտեսական, սոցիալական, մշակութային եւ հումանիտար բնույթի խնդիրները լուծելիս, փոխանցում է news.am-ը:

Բանաձեւը  ՄԱԿ Անվտանգության խորհրդին կոչ է անում շարունակել բոլոր տարածաշրջաններում զինված հակամարտությունների կանխմանն ուղղված ջանքերը։

Անվտանգության խորհրդի բանաձեւն ընդունած 15 անդամ պետությունները խոր անհանգստություն են հայտնել բռնության փաստերի, ատելության հռետորաբանության եւ ապատեղեկատվության առնչությամբ, որոնք տարածվում են այդ թվում նաեւ սոցիալական ցանցերով։

Փաստաթղթով կոչ է արվել միջազգային եւ կրոնական բոլոր կազմակերպություններին հրապարակայնորեն դատապարտել բռնությունը, ատելության հռետորաբանությունը, ծայրահեղականությունը, ռասայական, էթնիկական, սեռական, կրոնական եւ լեզվական խտրականությունը։