Արեւմտեան Հայաստանի Հանրապետութեան դեսպան Կիլյերմo Քարամանեան Արժանթինի մէջ իր հնգամեայ դիւանագիտական գործունէութեան վերաբերեալ ելոյթին ընթացքին ներկայացուցած է իր աշխատանքի հիմնական ուղղութիւնները եւ Հանրապետութեան իրաւական դիրքորոշումները։
Ելոյթին համաձայն՝ 2021-էն ի վեր Արժանթինի մէջ իրականացուող դիւանագիտական գործունէութեան նպատակն է միջազգային հարթակներու վրայ ներկայացնել Արեւմտեան Հայաստանի Հանրապետութեան տեսակէտը՝ հիմնուելով 1920 թուականի միջազգային իրաւական փաստաթուղթերուն վրայ։ Դեսպանը նշած է, որ այդ ընթացքին հանդիպումներ ունեցած է Արժանթինի քաղաքական, կրօնական, հասարակական եւ իրաւական շրջանակներու ներկայացուցիչներուն հետ, իսկ երկրի շարք մը լրատուամիջոցներ անդրադարձած են իր գործունէութեան։
Ելոյթին առանցքային նիւթերէն մէկը 1920-ին միջազգային մակարդակով ճանչց
ուած Հայաստանի պետութեան իրաւական ժառանգութեան հարցն էր։ Դեսպանը պնդած է, որ այդ իրաւական կարգավիճակը չէ վերացած, իսկ Արեւմտեան Հայաստանի Հանրապետութիւնը ինքզինք կը ներկայացնէ որպէս այդ պետականութեան շարունակողը։
Ան անդրադարձած է նաեւ 1991-ին Հայաստանի Հանրապետութեան անկախութեան հռչակման՝ ընդգծելով, որ, իր գնահատմամբ, անիկա չէ վերականգնած 1920-ի Հայաստանի ամբողջական տարածքային իրաւունքները։ Ելոյթին մէջ առանձնայատուկ շեշտուած են Արեւմտեան Հայաստանի պատմական տարածքներուն, ինչպէս նաեւ Արցախի, Նախիջեւանի, Ջաւախքի, Կարսի, Արտահանի եւ Սուրմալուի հարցերը։
Դեսպանը կոչ ուղղած է հայերուն չսահմանափակուիլ պատմական անցեալի յիշատակմամբ եւ աւելի աշխուժօրէն ներկայացնել իրենց իրաւական պահանջները միջազգային կառոյցներուն մէջ՝ պաշտպանելով բնիկութեան, պատմական ժառանգութեան եւ միջազգային իրաւունքի վերաբերեալ իրենց դիրքորոշումները։