Արեւմտեան Հայաստանի Հանրապետութեան երեւանեան առաքելութեան մէջ տեղի ունեցաւ հանդիպում՝ արցախահայութեան ներկայացուցիչներուն մասնակցութեամբ։ Հանդիպումը նախաձեռնած էր Արեւմտեան Հայաստանի Հանրապետութեան Ազգային Ժողովի պատգամաւոր, Արցախի հարցերով յանձնաժողովի նախագահ, «Շուշի» հայրենատիրական միութեան նախագահ, պատմաբան Աշոտ Յարութիւնեանը։
Հանդիպման հիմնական նպատակը Արցախի բնիկ հայ բնակչութեան մշակութային եւ պատմական ժառանգութեան նկատմամբ Պաքուի վարչակարգի կողմէ իրականացուող ոչնչացման քաղաքականութեան քննարկումն էր, ինչպէս նաեւ միջազգային իրաւական եւ հանրային հարթակներուն վրայ այդ հարցի բարձրացման ուղիներու որոնումը։
Միջոցառման ընթացքին ելոյթ ունեցաւ Արեւմտեան Հայաստանի Հանրապետութեան նախագահ Արմենակ Աբրահամեանը։ Ան անդրադարձաւ ներկայիս ընթացող դատական գործընթացներուն, որոնք առնչուած են արցախահայութեան իրաւունքներու պաշտպանութեան եւ միջազգային իրաւունքի ծիրին մէջ արդարութեան վերականգնման հնարաւորութիւններուն։ Իր խօսքին մէջ նախագահը շեշտեց, որ արցախահայութեան իրաւունքներու հարցը պէտք է շարունակաբար մնայ միջազգային կառոյցներու ուշադրութեան կեդրոնին։
Այնուհետեւ ելոյթ ունեցաւ Արցախի մշակութային ժառանգութեան պահպանութեան հարցերով մասնագէտ Յովիկ Աւանեսովը, ով ներկայացուց Արցախի մէջ իրականացուող ազրպէյճանական վանտալիզմի փաստերը։ Ան մասնաւորաբար անդրադարձաւ հայկական եկեղեցիներու, պատմամշակութային կոթողներու, գերեզմանոցներու եւ այլ արժէքաւոր ժառանգութեան ոչնչացման դէպքերուն՝ ընդգծելով, որ մշակութային ցեղասպանութեան այս դրսեւորումները լուրջ սպառնալիք կը ներկայացնեն տարածաշրջանի պատմական յիշողութեան համար։
Բանախօսը նաեւ ներկայացուց այն քայլերը, որոնք անհրաժեշտ է ձեռնարկել հայկական մշակութային ժառանգութեան պահպանման եւ միջազգային կազմակերպութիւններու ներգրաւման ուղղութեամբ՝ կանխելու շարունակուող աւերածութիւնները։
Հանդիպման ընթացքին ելոյթ ունեցաւ նաեւ Արցախի Գերագոյն Խորհուրդի եւ Արցախի Ազգային Ժողովի երկրորդ գումարման պատգամաւոր Աշոտ Սարգսեանը։ Ան ներկայացուց իր տեսակէտները Արցախի մշակութային ժառանգութեան պաշտպանութեան կարեւորութեան վերաբերեալ՝ շեշտելով, որ պատմամշակութային արժէքներու պահպանումը ոչ միայն ազգային, այլ նաեւ համամարդկային նշանակութիւն ունի։
Միջոցառման աւարտին ներկաներուն դիմեց Արեւմտեան Հայաստանի Հանրապետութեան Ազգային Ժողովի նախագահ Նելլի Յարութիւնեանը, ով կարեւորեց համազգային համախմբուածութիւնն ու հետեւողական աշխատանքը՝ Արցախի ժողովուրդի իրաւունքներու պաշտպանութեան եւ հայկական մշակութային ժառանգութեան պահպանման գործին մէջ։