Միջին Արեւելքի մէջ շարունակուող պատերազմին ընթացքին յայտնուեցաւ նոր ռազմական տեխնոլոգիա։ Տարբեր աղբիւրներու համաձայն՝ Իսրայէլի վարչակարգի բանակը Իրանի տարածքին մէջ սկսած է կիրառել արհեստական բանականութեամբ ղեկավարուող անօդաչու սարքերու մեծ խումբեր, որոնք կը թիրախաւորեն Իրանի անվտանգութեան ուժերը։
Վերջին հարձակումներուն ընթացքին անօդաչու սարքերը ճշգրիտ հարուածներ հասցուցած են Թեհրանի մէջ տեղակայուած Պասիճ աշխարհազօրայիններու անցակէտերուն, որոնք կը համարուին Իրանի իշխանութիւններու հիմնական կառոյցներէն մէկը եւ ներգրաւուած են ներքին վերահսկողութեան եւ անվտանգութեան ապահովման գործին մէջ։
Նոր համակարգը կը գործէ «մայրական հարթակ» սկզբունքով․ բարձրութեան վրայ գտնուող օդային սարքը կը ծառայէ որպէս հիմնական կրող եւ միաժամանակ կ’արձակէ բազմաթիւ փոքր յարձակողական անօդաչու սարքեր։ Անոնք համալրուած են արհեստական բանականութեամբ, տեսահսկման համակարգերով եւ մեծ տուեալներու պահոցով, ինչը թոյլ կու տայ յայտնաբերել եւ թիրախաւորել որոշակի մարդիկ կամ առարկաներ։
Տեխնոլոգիան կրնայ նաեւ օգտագործել դէմքերու ճանաչման համակարգ, ինչը հնարավորութիւն կու տայ իրականացնել շատ ճշգրիտ հարուածներ։ Մասնագէտներու խօսքով՝ այս ձեւը թոյլ կու տայ լայնածաւալ հետախուզութիւն եւ արագ յարձակումներ՝ նուազագոյն ժամանակի ընթացքին։
Անօդաչու սարքերու գործողութիւններուն կ’աջակցին նաեւ տարբեր օդային հարթակներ՝ ռազմական փոխադրական օդանաւեր, մեծ անօդաչու թռչող սարքեր եւ կործանիչներ, որոնք կրնան օդին մէջ արձակել փոքր անօդաչու սարքեր՝ յարձակման, հետախուզութեան կամ ելեկտրոնային պայքարի նպատակներով։
Ռազմական վերլուծաբանները կը նշեն, որ այս տեխնոլոգիան կրնայ փոխել պատերազմի բնոյթը տարածաշրջանին մէջ՝ դարձնելով զայն աւելի տեխնոլոգիական եւ դժուար կանխատեսելի։