Սիւնիքի մարզի Կոռնիձոր համայնքին մէջ՝ Հակարիի կամուրջին մօտ, ատրպէյճանական կողմը կը փորձէ առաջխաղացում ունենալ, սակայն, ըստ Կոռնիձորի վարչական ղեկավարի ժամանակաւոր պաշտօնակատար Սուրէն Ամարեանի, հայկական սահմանապահները թոյլ չեն տար։ Անոր խօսքով՝ այս պահուն կրակոցներ չկան, իսկ իրավիճակը հիմնականին մէջ կ՚ուղեկցուի բանաւոր վէճերով։
Ամարեան նշած է, որ Հակարիի կամուրջի հատուածին մէջ առկայ է սահմանազատման խնդիր։ Անոր տեղեկացմամբ՝ Կոռնիձորի մէջ Հայաստան-Ատրպէյճան սահմանի շուրջ 18 քիլոմեթր հատուած կայ, իսկ վերջին տարիներուն գիւղին մէջ սահմանապահ զօրքեր ծառայութիւն կը կատարեն։
Միաժամանակ, Կոռնիձորի բնակիչները կը բարձրաձայնեն անվտանգութեան, աշխատատեղերու եւ արտագաղթի խնդիրներուն մասին։ Բնակչուհի Նատաշա Դանիէլեանի խօսքով՝ յատկապէս երիտասարդները գիւղէն կը հեռանան աշխատանքի բացակայութեան պատճառով՝ հիմնականին մէջ տեղափոխուելով Կապան, Գորիս եւ Երեւան։
Գիւղացիները նաեւ կը նշեն, որ սահմանամերձ պայմանները ազդած են անասնապահութեան վրայ․ մարդիկ կը խուսափին անասունները հեռու արօտավայրեր տանելու, անվտանգութեան մտահոգութիւններու պատճառով։
Կոռնիձորի մէջ պաշտօնապէս գրանցուած է 1239 բնակիչ, սակայն ներկայիս հոն կ՚ապրի շուրջ 1000 մարդ։ Գիւղին մէջ կը բնակին նաեւ Արցախէն բռնի տեղահանուած 27 ընտանիք։
Տեղւոյն համայնքի ղեկավարութեան ներկայացուցիչները կարեւոր կը նկատեն սահմանազատման գործընթացը եւ գիւղին մէջ տնտեսական գործունէութեան զարգացումը՝ բնակչութեան համար կայուն ապրելու պայմաններ ստեղծելու նպատակով։