«Ուժեղ Հայաստան» խմբակցութեան պատգամաւորներն ու կուսակցութեան անդամները այցելած են Տիգրանաշէն՝ բնակիչներուն հետ համայնքի անվտանգային խնդիրներն ու զարգացման հնարաւորութիւնները քննարկելու համար։
Պատգամաւորները Տիգրանաշէնը կը համարեն Հայաստանի համար ռազմավարական նշանակութիւն ունեցող բնակավայր եւ կը շեշտեն, որ ան պէտք չէ յայտնուի Ատրպէյճանի վերահսկողութեան տակ։ Անոնց խօսքով՝ սահմանազատման եւ սահմանագծման գործընթացին մէջ անհրաժեշտ են յստակ երաշխիքներ, որպէսզի Տիգրանաշէնը Հայաստանին կապող ճանապարհին նկատմամբ օտար, մասնաւորաբար՝ ատրպէյճանական վերահսկողութիւն չհաստատուի։
Խմբակցութեան անդամները նշած են նաեւ, որ Տիգրանաշէնի հարցը պէտք է դիտարկել ոչ միայն անվտանգային, այլեւ զարգացման տեսանկիւնէն՝ առաջարկելով զարգացնել համայնքի տնտեսական ներուժը, ներառեալ՝ գաստրոտուրիզմի ծրագիրները։
Այցի մասնակիցները ընդգծած են բնակավայրի հայկական ըլլալու եւ զայն պահպանելու կարեւորութիւնը՝ նշելով. «Տիգրանաշէնը լոկ տարածք չէ», «Տիգրանաշէնը հարաւի եւ հիւսիսի միջեւ ողնաշար է»։