ԱՄՆ-ի եւ Իսրայէլի կողմէ Իրանի դէմ իրականացուող ռազմական գործողութիւնները հասած են իններորդ օրուան՝ մտնելով նոր եւ աւելի վտանգաւոր շրջան։ Իսրայէլական ուժերը սկսած են հարուածել Իրանի ուժային ենթակառուցուածքները, մասնաւորաբար՝ վառելիքի պահեստարանները։ Թեհրանի մէջ տեղի ունեցած հարուածներէն ետք քաղաքի երկինքը ծածկուած է խիտ ծուխով, իսկ որոշ վայրերու մէջ նոյնիսկ նկատուած է մուգ «սեւ անձրեւ»։
Միեւնոյն ժամանակ Իրանի մէջ կը շարունակուի անորոշութիւնը երկրի նոր գերագոյն առաջնորդի ընտրութեան հարցով։ Պետական լրատուամիջոցներու համաձայն՝ հոգեւորականները մօտ են նոր առաջնորդ ընտրելու, որ պիտի փոխարինէ մօտ չորս տասնամեակ երկիրը ղեկավարած Ալի Խամենէիին, որ զոհուած էր պատերազմի սկզբին։ Սակայն պաշտօնական յայտարարութիւն տակաւին չէ կատարուած։
Միաժամանակ Իրան կը շարունակէ իր պատասխան հարուածները։ Իրանական զինուժը յայտարարած է, որ իր յարձակողական կարողութիւններուն մօտ 60 տոկոսը կը գործածէ Մերձաւոր Արեւելքի մէջ ամերիկեան կեդրոններու դէմ, իսկ 40 տոկոսը՝ իսրայէլական թիրախներու դէմ։ Պարսից ծոցի շարք մը երկիրներու մէջ՝ Սաուտական Արաբիա, Քուէյթ, Պահրէյն, Քաթար եւ ԱՄԷ, նաեւ արձանագրուած են հրթիռային կամ անօդաչու սարքերու յարձակումներ։
Սաուտական Արաբիոյ մէջ ռազմական արկի հարուածի հետեւանքով զոհուած է երկու մարդ, իսկ եւս տասներկուքը վիրաւորուած են։ Ասիկա առաջին մահացու դէպքն է թագաւորութեան մէջ հակամարտութեան սկիզբէն ի վեր։
Մարդասիրական կազմակերպութիւններու տուեալներով՝ Իրանի մէջ պատերազմի սկիզբէն ի վեր զոհուած է առնուազն 1200 խաղաղ բնակիչ, որոնց մէջ կան մօտ 200 երեխայ։ Միաժամանակ Իսրայէլի եւ Լիբանանի սահմանին տեղի ունեցած մարտերու հետեւանքով զոհուած են նաեւ երկու իսրայէլցի զինուորներ։
Պատերազմը զգալի ազդեցութիւն ձգած է նաեւ տարածաշրջանի տնտեսութեան վրայ․ օդային թռիչքներու մէկ մասը դադրեցուած է, իսկ նաւթամթերքի գիները բարձրացած են՝ հիմնական Հորմուզի նեղուցով նաւթի փոխադրումներու խափանումներուն պատճառով։
Վերլուծաբանները կը նշեն, որ հակամարտութիւնը արագ կերպով կ’ընդլայնուի եւ կրնայ ներգրաւել Մերձաւոր Արեւելքի աւելի մեծ տարածք՝ աւելցնելով լայնածաւալ տարածաշրջանային պատերազմի վտանգը։