Իրանի արտաքին գործոց նախարարի տեղակալ Քազեմ Ղարիպաբադի Երեքշաբթի քննադատած է ԱՄՆ նախագահ Տոնալտ Թրամփի այն յայտարարութիւնը, թէ Հորմուզի նեղուցը «ԱՄՆ նոր տարածքն» է՝ զայն անուանելով զառանցանք եւ նախազգուշացնելով, որ Թեհրան զայն «պիտի ուղղէ»։

«Ինչպէս Թրամփ ճիշդ գրած է յաւերժական Պարսից ծոցի անունը, այնպէս ալ Հորմուզի նեղուցին վերաբերող անոր մոլորութիւնը շուտով կամ պիտի ուղղուի, կամ մենք պիտի ուղղենք այս մոլորած մարդուն մոլորութիւնները», — X-ի վրայ գրած է Ղարիպաբադի։

Ան արձագանգած է Թրամփի Truth Social-ի վրայ հրապարակած պատկերին, ուր Հորմուզի նեղուցին վերեւ գրուած էր՝ «ԱՄՆ ՆՈՐ ՏԱՐԱԾՔ» (NEW U.S. Territory)։