Ատրպէյճանի արտաքին գործերու նախարար Ճէյհուն Պայրամով այսօր յայտարարած է, որ Ատրպէյճանն ու Հայաստանը համաձայնութիւն ձեռք բերած են պետական սահմանին սահմանազատման գործընթացը հիւսիսէն հարաւ իրականացնելու վերաբերեալ՝ սկսելով Ատրպէյճանի, Հայաստանի եւ Վրաստանի սահմաններու հատման կէտէն։ Անոր խօսքով՝ անցած ժամանակաշրջանին երկու երկիրներու յանձնաժողովներուն միջեւ տեղի ունեցած են բազմաթիւ հանդիպումներ, իսկ յանձնաժողովներու գործունէութիւնը կարգաւորող շարք մը փաստաթուղթեր ընդունուած եւ հաստատուած են թէ՛ Ատրպէյճանի, թէ՛ Հայաստանի մէջ։
Այս յայտարարութենէն օրեր առաջ Նիկոլ Փաշինեան եւս յայտարարած էր․ «Ալմա-Աթայի հռչակագրի ընդունման պահին գոյութիւն ունեցող քարտէսներուն մէջ Արծուաշէնը Հայաստանի տարածք է, իսկ Քեարքին, Բաղանիս-Այրումը, Բարխուդարլուն, Յուխարի Ասկիպարան Հայաստանի տարածք չեն։ Սա փաստ է, որուն հետ մենք կ’առնչուինք»։
Այսօր մենք ուսումնասիրեցինք Google Maps-ը եւ պարզեցինք, որ Վերին Ոսկեպարը եւ Բարխուդարլու-Սոֆուլուն այնտեղ արդէն իբրեւ ատրպէյճանական տարածք կը ներկայացուին։ Աւելի վաղ, յիշեցնենք, Google Maps-ը Տիգրանաշէնը եւս սկսած էր իբրեւ ատրպէյճանական տարածք ներկայացնել։
Ատրպէյճանը, որպէս կանոն, սերտօրէն կը համագործակցի Google-ի հետ եւ իր բոլոր քայլերը նախապէս կը հիմնաւորէ այս կեղծ քարտէսներով, մինչդեռ Հայաստանի իշխանութիւնները ոչ միայն չեն հակազդեր անոր, այլեւ ամէն կերպ կ՚աջակցին հայկական հողերը ապօրինաբար խլելու այս գործընթացին։