«Արաս» հրատարակչութիւնը վերահրատարակած է պոլսահայ գրող Ատրինէ Տատրեանի «Մայթերուն վրայ» («Kaldırımlarda») վէպը, որ առաջին անգամ լոյս տեսած էր 1955 թուականին։ Գիրքը հրատարակչութեան «Պոլսահայ կին գրողներ» մատենաշարի երրորդ հատորն է։
Վէպը կը նկատուի Ատրինէ Տատրեանի ամենանշանակալից գործերէն մէկը։ Հեղինակը, որ յայտնի է նաեւ մանկական գրականութեան, թատրոնի եւ լրագրութեան բնագաւառներուն մէջ իր գործունէութեամբ, պարզ ու ազդեցիկ լեզուով կը ներկայացնէ հասարակ մարդոց առօրեան, ընկերային դժուարութիւններն ու մարդկային յարաբերութիւնները։
Վէպի կեդրոնական կերպարը Սիրա անունով աղջիկ մըն է, որ հօր մահէն ետք ստիպուած կ՚ըլլայ վաղաժամ հրաժեշտ տալ իր մանկութենէն։ Աշխատանքն ու ուսումը համատեղելով՝ ան կը պայքարի աղքատութեան, ընկերային անհաւասարութեան եւ կեանքի դժուարութիւններուն դէմ՝ փնտռելով իր սեփական ուղին Պոլսոյ փողոցներուն մէջ։
Վէպը կ՚արծարծէ կիներու ինքնութեան, աշխատանքի, ընկերային արդարութեան եւ գոյատեւման նիւթերը, որոնք արդիական են նաեւ այսօր։ Գիրքի հերոսներու աշխարհը կը կազմուի որբ մանուկներու, հիւանդ մայրերու, բանուորներու, արհեստաւորներու եւ քաղաքային աղքատ խաւերու կեանքի պատմութիւններով՝ ընթերցողին ներկայացնելով մարդասիրութեամբ եւ կարեկցանքով լի պատմութիւն մը։
«Մայթերուն վրայ» վէպի վերահրատարակութիւնը նոր առիթ մը կու տայ ընթերցողներուն՝ վերագտնելու պոլսահայ գրականութեան արժէքաւոր էջերէն մէկը եւ ծանօթանալու Ատրինէ Տատրեանի գրական ժառանգութեան։