Մարտինի շուրջ 1500-ամեայ Մոր Բեհնամ Կըրկլար եկեղեցին հիւրընկալած է «Հին Խօսքի թարմ ստուերին մէջ» խորագրով ժամանակակից արուեստի կառոյցը։ Աշխատանքը նուիրուած է ասորի հոգեւորական Գաբրիէլ Աքեուզի 41-ամեայ ծառայութեան եւ անոր՝ ասորական պատմութեան ու մշակոյթին նուիրուած 17 գիրքերուն։
Քիւրաթոր Օզճան Գեչերի պատրաստած աշխատանքը կազմուած է գիրքերու կազմերէ, որոնք լազերային եղանակով մշակուած են մետաղի վրայ եւ միաւորուած՝ պողպատէ հենքի մը վրայ։ Արդիւնքին ստեղծուած է թռչունի մը յիշեցնող խաչաձեւ կառոյց մը։ Անիկա ունի 6,25 x 3,75 մեթր չափեր եւ կը կշռէ շուրջ 150 քիլոկրամ։
Կառոյցին գաղափարական հիմքին մէջ կը գտնուի քրիստոնէական աստուածաբանութեան մէջ կարեւոր տեղ գրաւող «Խօսքի մարմնաւորում» գաղափարը։ Օրուան ընթացքին արեւուն շարժումին հետեւանքով մետաղեայ կազմերուն ստուերները կը տարածուին եկեղեցւոյ քարաշէն յատակին վրայ, իսկ գիշերը կառոյցը կը լուսաւորուի։
Նախագիծը իրականացուած է Մարտինի եւ Տիարպեքիրի մետրոպոլիտ Մոր Ֆիլուքսինոս Սալիպա Օզմենի հովանաւորութեամբ եւ ասորի համայնքին աջակցութեամբ։ «Հին Խօսքի թարմ ստուերին մէջ» կառոյցը եկեղեցւոյ այցելուներուն համար հասանելի է 2026 թուականի Օգոստոս 16-էն։