2026 թուականին լոյս տեսան հայագիտութեան, Հայերու ցեղասպանութեան պատմութեան, Կիլիկիոյ հայկական ներկայութեան, հայկական մշակոյթի եւ պատմական ժառանգութեան նուիրուած շարք մը նոր աշխատութիւններ։
Անոնց շարքին է Համբարձում Աղպաշեանի «Ոգեկոչելով Հայերու 1915-ի ցեղասպանութիւնը» անգլերէն հատորը, որ կը ներկայացնէ ցեղասպանութենէն առաջուան շրջանը, իրադարձութիւններու ընթացքը, յետպատերազմեան առաջին տարիները եւ Սեւրի դաշնագիրը։ Գիրքը կը ներառէ նաեւ քարտէս մը եւ աւելի քան 200 լուսանկար։
Սոսի Անտեզեանի եւ Լեւոն Նորտիկեանի խմբագրութեամբ հրատարակուած է ֆրանսերէն աշխատութիւն մը՝ Կիլիկիոյ մէջ հայկական ներկայութեան աւարտին եւ 1919-1920 թուականներուն ֆրանսական բանակի պարտութեան մասին՝ հիմնուած ֆրանսական ռազմական հետախուզութեան սպայ Ժոզէֆ Բաղջեանի վկայութիւններուն վրայ։
Նոր հրատարակութիւններու շարքին են նաեւ Կորիւն եւ Ռիշար Զարզաւաթճեաններու «Հայոց խոհանոցը» գիրքը, Վարդան Թաշճեանի «Յուշեր ու վուշեր» եւ «Նամականի Յ. Գեղարդի հետ» աշխատութիւնները, ինչպէս նաեւ Կարէն Թոխաթեանի «Հայաստանի ժայռապատկերները» ծաւալուն ուսումնասիրութիւնը։
Յատուկ ուշադրութեան արժանի է Պետրոս Տէր Մաթոսեանի եւ Էդիթա Գզոյեանի խմբագրութեամբ «Հայերու ցեղասպանութեան համակեդրոնացման ճամբարները» անգլերէն ժողովածուն, որ կը ներառէ հայ եւ օտարազգի ցեղասպանագէտներու 20 յօդուած եւ եզրակացութիւն։
Հրատարակուած է նաեւ Ժան Քորթէլի ֆրանսերէն աշխատութիւնը՝ Մուսա լերան հայերուն եւ անոնց փրկութեան գործողութեան մասին, ինչպէս նաեւ Երուանդ Օտեանի «Ընկեր Փանջունի» երգիծական վէպին արաբերէն թարգմանութիւնը՝ Ալեքսանդր Սարուխանի նկարազարդումներով։