Սեպտեմբեր 20-ին Պալաթի մէջ, «Սուրիչի» հարթակին նախաձեռնութեամբ, տեղի ունեցած է հանդիպում մը՝ նուիրուած Սամաթիա թաղամասի հայկական պատմութեան եւ դիմագիծին։ Բանախօսութեամբ հանդէս եկած է Բագրատ Էսդուգեան՝ անդրադառնալով Կոստանդնուպոլսոյ եւ յատկապէս Սամաթիայի պատմական զարգացման։
Էսդուգեանի ներկայացմամբ՝ 1453-ի օսմանեան նուաճումէն ետք Կոստանդնուպոլսոյ վերակազմաւորման մէջ կարեւոր դեր ունեցած է հայերու ներկայութիւնը։ Հայ համայնքի կազմաւորման առանցքային կեդրոններէն մէկը դարձած է Սամաթիան, ուր հիմնուած է Հայոց Պատրիարքարանը, իսկ բիւզանդական նախկին տաճարներէն մէկը փոխանցուած է հայ համայնքին։
Սամաթիան հետագային նաեւ կարեւոր ապաստան դարձած է տարբեր ժամանակաշրջաններու Կոստանդնուպոլիս տեղափոխուած հայերու համար։ Ցեղասպանութենէն ետք հոս ապաստան գտած են Պատմական Հայաստանէն փրկուած բազմաթիւ հայեր։ Հետագայ տասնամեակներուն թաղամասին մէջ հաստատուած են նաեւ Եոզղատէն, Մուշէն, Սասունէն եւ Հայաստանէն տեղափոխուած ընտանիքներ՝ շարունակելով Սամաթիայի հայկական կեանքի պատմութիւնը։
Հանդիպման ընթացքին անդրադարձ եղած է նաեւ Սամաթիայի, Գումգափուի եւ Գետիկփաշայի հայկական համայնքներու յայտնի դէմքերուն եւ անոնց ձգած ժառանգութեան։ Քննարկումը եւս մէկ անգամ ընդգծած է Սամաթիայի կարեւորութիւնը Կոստանդնուպոլսոյ հայկական պատմութեան եւ համայնքային յիշողութեան մէջ։