Սեբաստիոյ մէջ կանգուն մնացած հայկական եկեղեցիներէն գրեթէ միակը՝ Սուրբ Գէորգը, այսօր պահպանութեան եւ վերականգնման կարիք ունի։ 19-րդ դարուն սեբաստահայութեան կողմէ կառուցուած եկեղեցին աղբիւրներուն մէջ կը յիշատակուի նաեւ Սուրբ Սարգիս անունով։ Ան որոշ ժամանակ օգտագործուած է նաեւ տեղի յոյներուն կողմէ, իսկ հետագային՝ իբրեւ Թուրքիոյ զինուժի ռազմապահեստարան։
2016 թուականին Թուրքիոյ իշխանութիւնները հաստատած էին եկեղեցւոյ վերականգնման նախագիծը եւ յայտարարած աշխատանքներու մեկնարկին մասին։ Սակայն շուրջ տասը տարի անց վերականգնման աշխատանքները տակաւին չեն իրականացուած։ Նախատեսուած է եկեղեցին վերականգնել պատմական տեսքով եւ ներառել զբօսաշրջային ծրագիրներու մէջ։