2026 թուականի Յունիս 5-ին, ժամը 17:30-20:00, Ֆրանսայի մայրաքաղաք Փարիզի մէջ տեղի պիտի ունենայ «Կեանքեր՝ բեկորներու մէջ. ինքնապատում աղբիւրներ եւ կենսագրական մօտեցումներ Հայերու ցեղասպանութեան վերաբերեալ» գիրքի ներկայացում-քննարկումը։

Միջոցառումը պիտի կայանայ Փարիզի EHESS հաստատութեան մէջ (54 boulevard Raspail, 75006 Paris)։

Berghahn հրատարակչութեան կողմէ 2026-ին լոյս տեսած գիրքը խմբագրուած է Էրէն Եըլտըրըմ Եթքինի, Նազան Մաքսուտեանի եւ Ատնան Չելիքի կողմէ։ Աշխատութիւնը Հայերու ցեղասպանութեան պատմութիւնը կը քննէ ինքնապատում աղբիւրներու եւ կենսագրական մօտեցումներու լոյսին տակ։

Քննարկման պիտի մասնակցին շարք մը գիտնականներ, որոնց կարգին են Էրէն Եըլտըրըմ Եթքինը (Պերլինի Կաթոլիկ Կիրառական Գիտութիւններու Համալսարան), Նազան Մաքսուտեանը (Freie Universität Berlin / Centre Marc Bloch), Ատնան Չելիքը (EHESS / CETOBaC), ինչպէս նաեւ Տույկու Թասալփը (CETOBaC) եւ Պորիս Աճէմեանը (UGAB-ի Նուպար Գրադարան)։

Միջոցառման վարողն է Օզկիւր Սեւկի Կէօրալը (CETOBaC / EHESS)։

Այս գիտական հանդիպումը նպատակ ունի խորացնելու Հայերու ցեղասպանութեան ուսումնասիրութիւնները՝ առանձնայատուկ ուշադրութիւն դարձնելով անձնական յիշողութիւններու եւ կենսագրական պատմութիւններու դերին պատմագիտական վերլուծութեան մէջ։