ԱՄՆ-ում գործող հայկական կրթական հաստատություններում ներդրվում են Հայերի ցեղասպանության թեմային նվիրված նոր ուսումնական ծրագրեր։ Այս մասին Alpha News-ի հետ զրույցում հայտնել է լրագրող և հաղորդավար Նունե Սիմոնյանը։
Նրա խոսքով՝ ԱՄՆ-ում գործում է շուրջ 22 հայկական դպրոց, որոնց մեծ մասը գտնվում է Կալիֆորնիայում, իսկ մնացածը՝ Նյու Ջերսիում, Փենսիլվանիայում, Միչիգանում և Նյու Յորքում։ Սիմոնյանը նշել է, որ Հայերի ցեղասպանության թեման կարևոր տեղ է զբաղեցնում ոչ միայն դպրոցական կրթական ծրագրերում, այլև ԱՄՆ-ի մի շարք համալսարանների հայագիտական ամբիոնների աշխատանքում։
Նրա գնահատմամբ՝ նման նախաձեռնությունները կրում են համակարգային բնույթ և ամրագրված են կրթական քաղաքականության շրջանակում։
Միաժամանակ Սիմոնյանը անդրադարձել է Հայաստանի որոշ համայնքներում դպրոցների օպտիմալացման գործընթացին՝ նշելով, որ այն հասարակական քննարկումների և տարբեր մեկնաբանությունների առիթ է դարձել։
Նա ընդգծել է, որ սահմանամերձ և փոքր համայնքներում դպրոցների գործունեության կազմակերպման հարցը առաջացնում է մի շարք սոցիալական և լոգիստիկ խնդիրների վերաբերյալ մտահոգություններ, հատկապես աշակերտների տեղափոխման և կրթության հասանելիության համատեքստում։