Յուլիսի 15-ին տեղի ունեցաւ Արեւմտեան Հայաստանի Ազգային ժողովի (Խորհրդարանի) 25-րդ առցանց նիստը, որ վարեց Ազգային ժողովի փոխնախագահ Մարիէթա Դումիկեան։ Նիստի ընթացքին պատգամաւորները միաձայն հաստատեցին օրակարգը եւ լսեցին նախորդ նիստի արձանագրութիւնը։
Էտիդա Բեգլարեան ներկայացուց Ժընեւի մէջ ընթացող ՄԱԿ-ի Բնիկ ժողովուրդներու Փորձագէտներու մեխանիզմի (EMRIP) 18-րդ նստաշրջանի ծիրին մէջ կայացած հանդիպումներուն եւ ելոյթներուն ամփոփումը։ Նշուեցաւ, որ Արեւմտեան Հայաստանի Հանրապետութեան նախագահ Արմենակ Աբրահամեան եւ պատուիրակութեան անդամ Գագիկ Թադեւոսեան իրենց ելոյթներուն մէջ անդրադարձած են Արցախի պատմամշակութային ժառանգութեան ոչնչացման, հայատեացութեան դրսեւորումներուն, արհեստական բանականութեան միջոցով տարածուող ատելութեան խօսքին եւ Ազրպէյճանի շարունակուող զաւթողական քաղաքականութեան։
Նիստի երկրորդ բաժինին մէջ Մարիէթա Դումիկեան ներկայացուց հայ ժողովուրդի հնագոյն խորհրդանիշներու պատմութիւնը, անոնց նշանակութեան վերաբերեալ տարբեր մեկնաբանութիւններն ու ժամանակակից ընկալումները։ Քննարկումը ընթացաւ աշխոյժ մթնոլորտի մէջ՝ ընդգծելով ազգային խորհրդանիշներու պահպանման եւ արժեւորման կարեւորութիւնը։