Մարտինի Սուրբ Բեհնամ-Քըրքլար ասորական եկեղեցւոյ մէջ ներկայացուած է «Հնագոյն Խօսքի թարմ ստուերին մէջ» խորագրով յուշարձան-տեղադրումը՝ նուիրուած ասորական մշակոյթի կարեւոր գործիչ, եկեղեցւոյ մէջ 41 տարի ծառայած աւագ քահանայ Գաբրիէլ Աքյուզի կեանքին ու ժառանգութեան։
Տեղադրման հեղինակն է արուեստագէտ եւ համադրող Օզճան Գեճերը։ Աքյուզի՝ ասորական պատմութեան եւ մշակոյթի վերաբերեալ գրած 17 գիրքերուն կազմերը լազերային եղանակով փորագրուած են մետաղեայ մակերեսներու վրայ եւ միաւորուած՝ մեծածաւալ խաչաձեւ կառոյցի մը մէջ։ Աշխատանքին մաս կը կազմեն նաեւ հնագոյն խնկաման մը, վիտրաժը, լոյսն ու ձայնը։
Տեղադրման շուրջ 150 քիլոկրամ կշռող մետաղական կառոյցին ստուերը օրուան ընթացքին, արեւուն շարժման զուգահեռ, կը փոխէ իր ձեւը՝ խորհրդանշելով յիշողութեան, մնայունութեան եւ անցողիկութեան կապը։ Գիշերը կառոյցը կը լուսաւորուի եւ նոր կերպով կը շեշտադրէ եկեղեցւոյ տարածքը։
Մ.թ. 539 թուականին կառուցուած համարուող Սուրբ Բեհնամ-Քըրքլար եկեղեցին դարեր շարունակ եղած է ոչ միայն աղօթքի, այլեւ ասորական համայնքի կրթական ու մշակութային կարեւոր կեդրոններէն մէկը։ Նոր տեղադրումը այդ պատմական ժառանգութեան կը միացնէ Գաբրիէլ Աքյուզի 41-ամեայ ծառայութիւնն ու գրական ժառանգութիւնը՝ անոր ձգած հետքը վերածելով Մարտինի արեւուն ամէնօրեայ փոփոխուող ստուերին։