Յուլիս 8-ին տեղի ունեցաւ Արեւմտեան Հայաստանի Հանրապետութեան Ազգային ժողովի (Խորհրդարանի) 24-րդ նիստը, որ վարեց Արեւմտեան Հայաստանի Հանրապետութեան նախագահ Արմենակ Աբրահամեան։ Առցանց ձեւաչափով գումարուած նիստին մասնակցեցան ընտրուած 52 պատգամաւորներէն 16-ը։
Նիստի ընթացքին միաձայն հաստատուեցաւ օրակարգը, որմէ ետք նախագահ Արմենակ Աբրահամեան զեկոյց ներկայացուց՝ անդրադառնալով սիոնիզմին՝ որպէս քաղաքական եւ ազգային շարժում։ Ան ներկայացուց սիոնիզմի կազմաւորման պատմական ու քաղաքական նախադրեալները, նպատակներն ու ազդեցութիւնը, յատկապէս Արեւմտեան Հայաստանի եւ հայ ժողովուրդին վրայ։
Օրակարգի յաջորդ կէտով Ազգային ժողովի նախագահ Նելլի Յարութիւնեան ներկայացուց Յուլիս 13-17-ին կայանալիք ՄԱԿ-ի Բնիկ ժողովուրդներու իրաւունքներու փորձագիտական մեխանիզմի 19-րդ նստաշրջանի աշխատանքները։ Նշուեցաւ, որ նիստի ընթացքին ելոյթներով հանդէս պիտի գան Արմենակ Աբրահամեան եւ Լիտիա Մարկոսեան՝ ներկայացնելով բնիկ ժողովուրդներու իրաւունքներուն առնչուող հարցեր։
Նիստի աւարտին նախագահ Արմենակ Աբրահամեան ամփոփեց քննարկումները՝ շեշտելով միջազգային հարթակներու վրայ Արեւմտեան Հայաստանի եւ բնիկ հայ ժողովուրդի իրաւունքներու հետեւողական պաշտպանութեան կարեւորութիւնը։