ԲԵՅՐՈՒԹ․ Հայկազյան համալսարանի հրատարակչությունն ու «Հայրենիք» հրատարակչությունը հայտարարել են «Յուշամատեան» մատենաշարի մեկնարկի մասին։ Մատենաշարի առաջին հատորը Բարունակ Թոփալյանի «Իմ հայրենի գյուղս՝ Օխու» աշխատության անգլերեն թարգմանությունն է՝ My Native Village: Okhou։
1943 թվականին Բոստոնում առաջին անգամ հրատարակված գիրքը ներկայացնում է Օսմանյան կայսրության Խարբերդի շրջանի Բալու գավառի հայկական Օխու գյուղի պատմությունն ու առօրյան։ Հեղինակը՝ Հայերի ցեղասպանությունը վերապրած Բարունակ Թոփալյանը, իր հիշողությունների միջոցով վերակերտում է կորսված հայրենի գյուղի աշխարհը։ Անգլերեն թարգմանությունը կատարել է Սիմոն Բեոճեքյանը։
«Յուշամատեան» մատենաշարը նպատակ ունի հայերեն արժեքավոր հուշագրությունները թարգմանել և հասանելի դարձնել նոր սերունդներին ու միջազգային ընթերցողներին։ Հրատարակությունները ներառելու են նաև պատմագիտական մեկնաբանություններ և ժողովրդագրական ու ուսումնասիրական նյութեր՝ ներկայացնելով նախկին Օսմանյան կայսրության հայկական համայնքների պատմությունն ու մշակութային ժառանգությունը։
Նախաձեռնությունը կարևոր նշանակություն ունի ցեղասպանությունից և տեղահանությունից հետո կորսված հայկական համայնքների հիշողությունը պահպանելու գործում։ Հուշամատյանները ոչ միայն պատմական աղբյուրներ են, այլև վկայություններ, որոնց միջոցով սերունդներին են փոխանցվում հայկական գյուղերի ու քաղաքների կյանքը, ավանդույթները և հայրենիքի մասին հիշողությունը։
Մատենաշարի առաջին հատորի հրատարակությամբ մեկնարկում է լայնածավալ աշխատանք՝ հայկական պատմական հիշողությունը պահպանելու և այն նոր սերունդներին ու միջազգային հանրությանը փոխանցելու ուղղությամբ։