2026 թվականի հունվարի 19-ին նշվեց Արևմտյան Հայաստանի Հանրապետության անկախության 106-րդ տարեդարձը։ Տարեդարձին նվիրված միջոցառմանը մասնակցեցին Ազգային ժողովի պատգամավորներ, կառավարության անդամներ, հասարակական գործիչներ և հայ հանրության ներկայացուցիչներ։
Միջոցառման ընթացքում ելույթ ունեցավ Արևմտյան Հայաստանի Հանրապետության նախագահ Արմենակ Աբրահամեանը։ Իր խոսքում նա նշեց, որ թեև հայկական հարցը հաճախ անտեսվում կամ լռության է մատնվում որոշ մեդիաների կողմից, Արևմտյան Հայաստանի հայությունը շարունակելու է իր ձայնը հնչեցնել աշխարհի և համաշխարհային հայության առջև։ Նախագահը շեշտեց, որ որքան էլ փորձ արվի ճնշել կամ ժխտել Արևմտյան Հայաստանի հայության գոյությունը, հայ ժողովուրդը գոյություն ունի և շարունակելու է իր պայքարը։
Արմենակ Աբրահամեանը ընդգծեց, որ Արևմտյան Հայաստանի հայությունը պարտավոր է պահպանել իր ազգային ինքնությունը, պատմությունը, մշակույթը, աշխարհագրական հիշողությունը և բնությունը՝ միաժամանակ շարունակելով իր իրավական պայքարը։ Նրա խոսքով՝ այսօր, թեև պատմական տարածքները գտնվում են օտար պետությունների վերահսկողության ներքո, դա չի կարող վերացնել հայ ժողովրդի պետական իրավունքներն ու պատմական ճշմարտությունը։
Ելույթում շեշտվեց, որ գոյություն ունեն ուժեր, որոնք փորձում են ժխտել Արևմտյան Հայաստանի հայության իրավունքներն ու պատմական ներկայությունը, սակայն իրական Հայաստանը հենց այն հայությունն է, որը մինչև այսօր պաշտպանել է իր ինքնությունը և իրավունք ունի ապրելու, զարգանալու, ընտանիք կազմելու և իր զավակների ապագան կերտելու։
Նախագահը անդրադարձավ նաև ազգային պատվիրակության ձևավորմանը՝ ընդգծելով, որ Պողոս Նուբարի նախաձեռնությամբ և ջանքերով ստեղծված ազգային պատվիրակությունը կարևոր դեր է ունեցել Հայոց ցեղասպանության տարիներին և հետագայում՝ միջազգային հարթակներում հայ ժողովրդի իրավունքների պաշտպանության գործում։ Այդ պատվիրակության նպատակը եղել է Արևմտյան Հայաստանի պետականության գաղափարի պահպանումն ու իրավական շարունակականությունը։
Միջոցառման ավարտին վերահաստատվեց, որ անկախության գաղափարը կենդանի է, և պայքարը շարունակվելու է մինչև պատմական արդարության վերականգնումը և հայրենի տարածքների ազատագրումը։