«Արեւի» յանձնաժողովի անունով մեր ջերմ ողջոյնները կը յղենք Արեւմտեան Հայաստանի Հանրապետութեան եւ Արեւմտեան Հայաստանի Ազգային ժողովի ղեկավարներուն, ինչպէս նաեւ Արեւմտեան Հայաստանի ժողովուրդին՝ Արեւմտեան Հայաստանի Ազգային ժողովի 13-ամեակին առիթով։
Ամբողջ մէկ դար Արեւմտեան Հայաստանի ժողովուրդը դիմագրաւած է ազգային ինքնութեան, լեզուի եւ մշակոյթի պահպանման ծանր մարտահրաւէրները։ Ձուլման եւ կորուստներու այդ պատմական ընթացքը սկսաւ աստիճանաբար փոխուիլ, երբ Արմենակ Աբրահամեանի առաջնորդութեամբ կազմաւորուեցաւ Արեւմտեան Հայաստանի Հանրապետութիւնը եւ անոր Ազգային ժողովը՝ դառնալով կազմակերպուած քաղաքական կամքի եւ ազգային ինքնագիտակցութեան արտայայտութիւնը։ Այսօր մենք կը նշենք այդ խորհրդարանին 13-ամեակը։
Օտար պետութիւններու աջակցութեամբ Օսմանեան պետութիւնը, գործադրելով իր ամբողջ ուժը, բնաջնջեց հայ ժողովուրդը իր բնօրրան Արեւմտեան Հայաստանի տարածքներէն՝ ցեղասպանութեան միջոցով, փաստօրէն Հայաստանը ձգելով առանց հայերու։
Անցնող 13 տարիներուն Ազգային ժողովի գործունէութիւնը, ինչպէս նաեւ «Western Armenia TV»-ի հետ համագործակցութիւնը, կը նկատուին մշակութային եւ ազգային ինքնութեան պահպանման կարեւոր նախաձեռնութիւններ։ Այս աշխատանքը կարելի է համարել շարունակական սերմանում, որուն նպատակն է ամրապնդել ազգային գիտակցութիւնն ու պատմական յիշողութիւնը։
Մենք համոզուած ենք, որ գիտակից, իրապաշտ եւ դիւանագիտական ջանքերով կարելի է շարունակել ազգային նպատակներու առաջմղումը՝ հեռու մնալով ծայրայեղ մօտեցումներէ եւ սադրանքներէ։ Ճամբան դիւրին չէ, սակայն ազգային գիտակցութենէն ծնած ուժը կրնայ յաղթահարել բոլոր դժուարութիւնները։
Արեւմտեան Հայաստանի Հանրապետութիւնը եւ անոր Ազգային ժողովը այսօր նաեւ յիշողութեան վերականգման եւ իրաւունքներու միջազգային պաշտպանութեան կարեւոր հարթակներ են։
Մեր Ազգային ժողովը, որ հիմնադրուեցաւ 13 տարի առաջ, նպատակ ունի պահպանել եւ ներկայացնել Արեւմտեան Հայաստանի պատմական ու իրաւական ժառանգութեան վերաբերող հարցերը՝ կապուած նաեւ 1920 թուականի Սեւրի դաշնագիրի պատմական նշանակութեան հետ։
Հայրենասիրութիւնը դժուար է բառերով սահմանել։ Ան կ՚ապրի մարդուն հոգիին մէջ՝ որպէս յիշողութիւն, զգացում եւ պատասխանատուութիւն։ Ինչպէս պատմական օրինակները կը վկայեն, շատերու համար հայրենիքը նոյնիսկ հեռուէն կը մնայ անփոխարինելի արժէք, եւ անոր վերադառնալու երազանքը երբեք չի մարիր։
Կեցցէ՛ Արեւմտեան Հայաստանի Հանրապետութիւնը։
Կեցցէ՛ Արեւմտեան Հայաստանի Ազգային ժողովը։
Կեցցէ՛ հայ ժողովուրդը։