Կրթութեամբ աշխարհագրագէտ, արշաւորդ ու լեռնագնաց Տիգրան Վարագը 2012-ին հիմներ է Armenian Geographic նախագիծն ու զբաղուեր է աշխարհագրական զբօսաշրութեամբ։ Հայաստանի ու Արցախի յայտնի ու անյայտ լեռներն ուսումնասիրելէն ետք Armenian Geographic-ը վերջին տարիներուն սկսեր է ուսումնասիրել Արեւմտեան Հայաստանի մէջ գտնուող լեռները։

2014-էն կ’ուսումնասիրենք ու կը բացայայտենք Հայկական լեռնաշխարհը, նկատի ունինք այն լեռները, որոնք ՀՀ տարածքէն դուրս են։ 5-6 օրով կ’երթանք Արեւմտեան Հայաստան։ Ստանդարտ տուրերու աշխարհագրութիւնն ինչպիսի՞ն է՝ դէպի Անի, Կարս, Վան, Մուշ, Էրզրում, Բայազետ, որոնք առհասարակ քաղաքներ են, քանի մը պատմական յուշարձաններով։ Մեր խումբն այդ ամենը մէկ անգամ տեսնելէ ետք այդ էջը փակեց. մեզ լեռները կը հետաքրքրէին աւելի շատ:

Սկսեցինք բացայայտել այն լեռները, որոնց մասին ընդհանրապէս տեղեկութիւն չկար։ Կոպիտ ըսելով՝ 100 տարի առաջուայ ընդհատուած կապը կրկին վերականքնեցինք լեռներուն հետ։ Մարաթուկ, Անդոկ, Ծովասար, Վարագ, Արտոս, Նեմրութ. այս սարերուն մասին կը հանդիպէինք միայն գրականութեան մեջ, երգերով, բայց չէինք ճանչնար գոնե մէկ մարդ, որ բարձրացեր էր անոնց վրայ։ Օրինակ՝ Վարագավանքի մասին բոլորը գիտեն, կաթողիկոսանիստ վանք  եղած է, Խրիմեան Հայրիկն այնտեղ նստեր է, հայերու համար Վարագը սուրբ լեռ կը համարուէր, բայց ոչ մէկը չէր բարձրացած, մենք առաջինն էինք։